हवामान विभागाचा नांदेड जिल्ह्यासाठी ‘येलो’ अलर्ट: मुसळधार पावसाची शक्यता, नागरिकांनी काळजी घ्यावी

नांदेड -प्रादेशिक हवामानशास्त्र केंद्र, मुंबईने दिलेल्या सूचनेनुसार नांदेड जिल्ह्यासाठी ११ ते १५ सप्टेंबर २०२५ या पाच दिवसांसाठी ‘यलो अलर्ट’ (Yellow Alert) जारी केला आहे. या काळात जिल्ह्यात मुसळधार पाऊस, वादळी वारे आणि विजांच्या कडकडाटासह पाऊस पडण्याची शक्यता वर्तवण्यात आली आहे.
हवामान विभागाने दिलेल्या माहितीनुसार, १२ सप्टेंबर २०२५ रोजी जिल्ह्यात काही ठिकाणी वादळी वाऱ्यासह मुसळधार पाऊस पडण्याची शक्यता आहे. या वादळी वाऱ्याचा वेग ३० ते ४० किलोमीटर प्रति तास असू शकतो. त्याचप्रमाणे, ११, १३, १४ आणि १५ सप्टेंबर २०२५ रोजी तुरळक ठिकाणी ताशी ३० ते ४० किलोमीटर वेगाने वाऱ्यासह हलका ते मध्यम स्वरूपाचा पाऊस होण्याची शक्यता आहे. या नैसर्गिक आपत्तीच्या पार्श्वभूमीवर नागरिकांना आणि सर्व संबंधित यंत्रणांना खबरदारी घेण्याचे आवाहन करण्यात आले आहे.
नागरिकांनी घ्यावयाची काळजी
या हवामानामुळे उद्भवणाऱ्या संभाव्य धोक्यांपासून सुरक्षित राहण्यासाठी नागरिकांनी खालील गोष्टींचे पालन करावे.
काय करावे?
* विजांच्या कडकडाटासह पाऊस येण्याची शक्यता असल्यास घराबाहेर पडणे टाळा.
* मोकळ्या जागेत असाल आणि जवळपास सुरक्षित इमारत नसेल, तर लगेच सखल जागेत जाऊन गुडघ्यात डोके घालून बसा.
* घराबाहेर असताना आकाशात विजा चमकत असल्यास घरात किंवा सुरक्षित इमारतीत आश्रय घ्या. घराच्या बाल्कनी, छत किंवा घराबाहेरील ओट्यावर थांबू नका.
* घरातील विद्युत उपकरणे चालू असल्यास, ती त्वरित बंद करा.
* तारांचे कुंपण, विजेचे खांब आणि इतर लोखंडी वस्तूंपासून दूर राहा.
* पाण्यात उभे असाल तर तात्काळ पाण्यातून बाहेर पडा.
काय करू नये?
* विजा चमकत असताना लँडलाईन फोनचा वापर करू नका. तसेच शॉवरखाली आंघोळ करू नका.
* घरातील बेसिनचे नळ आणि पाण्याच्या पाईपलाइनला स्पर्श करू नका.
* लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका.
* उंच झाडाच्या खाली उभे राहू नका.
* धातूंच्या उंच मनोऱ्याजवळ थांबणे टाळा.
* घरात असताना उघड्या दरवाजातून किंवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे.
या सूचनांचे पालन करून नागरिकांनी स्वतःची आणि आपल्या कुटुंबाची काळजी घ्यावी, असे आवाहन करण्यात आले आहे.