Ankush Sonsale
Nanded Vruttavedh
नांदेड – मुंबई विभागात ठाकूरवाडी ते मंकीहिल स्थानकांदरम्यान दरड कोसळल्यामुळे रेल्वे वाहतुकीवर मोठा परिणाम झाला आहे. प्रवाशांच्या सुरक्षिततेचा विचार करून रेल्वे प्रशासनाने काही गाड्यांच्या सेवेत तात्पुरते बदल केले आहेत. सध्या रेल्वे प्रशासन परिस्थितीवर सतत लक्ष ठेवून असून, विस्कळीत झालेली वाहतूक लवकरात लवकर पूर्ववत करण्यासाठी आवश्यक ती युद्धपातळीवर कार्यवाही करण्यात येत आहे.
या आपत्कालीन परिस्थितीमुळे दिनांक ०७ जुलै रोजी सुटणाऱ्या गाडी क्रमांक १७६१३ पनवेल–हजूर साहिब नांदेड एक्सप्रेसच्या मार्गात बदल करण्यात आला आहे. ही गाडी आता नियमित मार्गाऐवजी इगतपुरी–मनमाड–अंकाई–दौंड मार्गे धावणार आहे. या गाडीच्या प्रस्थान स्थानकातही बदल करण्यात आला असून, ही एक्सप्रेस पनवेल ऐवजी थेट इगतपुरी येथून मार्गस्थ होईल.
दक्षिण मध्य रेल्वेच्या नांदेड मंडळाने प्रवाशांना आवाहन केले आहे की, त्यांनी रेल्वे प्रवासाला निघण्यापूर्वी आपल्या गाडीची अद्ययावत माहिती अवश्य घ्यावी. यासाठी प्रवाशांनी रेल्वे चौकशी सेवा १३९, NTES ॲप, IRCTC ची अधिकृत वेबसाईट किंवा जवळच्या रेल्वे स्थानकाशी संपर्क साधूनच आपल्या प्रवासाचे योग्य नियोजन करावे.
