Ankush Sonsale
Nanded Vruttavedh । नायगाव घरफोडीचा गुन्हा उघड Nanded Vruttavedh
नांदेड – येथील नायगाव पोलीस ठाणे हद्दीत झालेली मोठी घरफोडी स्थानिक गुन्हे शाखेने अवघ्या दोन दिवसांत उघडकीस आणली आहे. धक्कादायक बाब म्हणजे, फिर्यादीच्या स्वतःच्या मुलानेच आपल्या मैत्रिणीच्या मदतीने हा घरफोडीचा कट रचल्याचे पोलीस तपासात समोर आले आहे, अशी माहिती, जिल्हा पोलीस अधीक्षक डॉ. निलाभ रोहन यांनी बुधवारी पत्रकार परिषदेत दिली. या कारवाईत पोलिसांनी आरोपी मुलगा आणि त्याच्या विधिसंघर्षग्रस्त बालिकेला (मैत्रीण) ताब्यात घेऊन त्यांच्याकडून 9 लाख 36 हजार 600 रुपये किमतीची रोख रक्कम जप्त केली आहे.
पोलीस अधीक्षक डॉ. नीलाभ रोहन यांच्या मार्गदर्शनाखाली स्थानिक गुन्हे शाखेचे पोलीस निरीक्षक अतुल भोसले यांनी या गुन्ह्याचा शोध घेण्यासाठी एका विशेष पथकाची नियुक्ती केली होती. पोलीस उपनिरीक्षक नागनाथ तुकडे व त्यांच्या पथकाने गोपनीय माहिती, तांत्रिक विश्लेषण आणि परिसरातील सीसीटीव्ही फुटेजच्या आधारे तपास चक्रे फिरवली. संशयावरून फिर्यादीचा मुलगा शुभम कौठकर याच्याकडे पोलिसांनी सखोल चौकशी केली असता, त्याने आपल्या गुन्ह्याची कबुली दिली.
शुभमने पोलिसांना दिलेल्या माहितीनुसार, त्याचे कुटुंब देवदर्शनासाठी बाहेर जाणार असल्याची पूर्वकल्पना त्याने आपल्या अल्पवयीन मैत्रिणीला दिली होती. इतकेच नव्हे तर घराच्या कुलूपाची अतिरिक्त चावी कुठे ठेवली आहे आणि घरात प्लॉट खरेदीसाठी मोठी रोकड ठेवली आहे, ही गुप्त माहितीही त्याने तिला पुरवली होती. दिनांक २६ जून रोजी कुटुंब घराबाहेर पडताच, पूर्वनियोजित कटानुसार त्या बालिकेने अतिरिक्त चावीचा वापर करून घरात प्रवेश केला आणि लोखंडी पेटीत ठेवलेले 9 लाख 70 हजार रुपये चोरून नेले.
गुन्ह्याचा उलगडा झाल्यानंतर पोलिसांनी तातडीने कारवाई करत चोरीला गेलेल्या रकमेपैकी 9 लाख 36 हजार 600 रुपयांची रोख रक्कम हस्तगत केली आहे. याप्रकरणी पुढील कायदेशीर कारवाई सुरू आहे. ही उल्लेखनीय कामगिरी अपर पोलीस अधीक्षक अर्चना पाटील (भोकर), अपर पोलीस अधीक्षक सूरज गुरव (नांदेड) आणि पोलीस निरीक्षक अतुल भोसले यांच्या मार्गदर्शनात पोउपनि नागनाथ तुकडे, दारासिंग राठोड, मोहन हाके, महेश बडगु, ब्रह्मानंद लामतुरे, शिलराज ढवळे, शितल सोळंके, लहू चाटे आणि आबाराव पिंगलवाड यांच्या पथकाने यशस्वीरित्या पार पाडली.
