Ankush Sonsale
नांदेड परिक्षेत्रात गुटखा विरोधी मोहीम तीव्र; पाच कारवायांत नऊ जणांना अटक; साडेआठ लाख रुपयांचा मुद्देमाल जप्त
नांदेड: परिक्षेत्राचे पोलीस उप महानिरीक्षक शहाजी उमाप यांनी दि. १६ ते ३१ मार्च दरम्यान गुटखा व प्रतिबंधित तंबाखूजन्य पदार्थांविरुद्ध व्यापक मोहीम हाती घेतली आहे. नागरिकांचा कॅन्सरसारख्या जीवघेण्या आजारांपासून बचाव व्हावा, या सामाजिक उद्देशाने ही मोहीम राबविण्यात येत आहे. मोहिमेच्या पाचव्या दिवशी पोलिसांनी मोठी कारवाई करत गुटखा विक्री, साठवणूक आणि वाहतूक करणाऱ्या नऊ आरोपींना जेरबंद केले आहे.
या मोहिमेअंतर्गत नांदेड जिल्ह्यातील भाग्यनगर व मुखेड, परभणीतील बोरी, लातूरमधील उदगीर ग्रामीण आणि हिंगोली जिल्ह्यातील औंढा नागनाथ अशा एकूण पाच पोलीस ठाण्यांनी धडक कारवाया केल्या आहेत. या कारवाईत भारतीय न्याय संहितेच्या कलम १२३ अन्वये ५ गुन्हे दाखल करण्यात आले असून नऊ आरोपींना अटक करण्यात आली आहे. पोलिसांनी या कारवाई दरम्यान गुटखा आणि इतर साहित्यासह एकूण ८ लाख ४२ हजार ९० रुपयांचा मुद्देमाल जप्त केला आहे.
या मोहिमेमध्ये सुगंधी तंबाखू, पान मसाला, मावा आणि गुटख्याच्या अवैध वाहतूक व साठवणुकीवर बारकाईने लक्ष ठेवले जात आहे. भारतीय न्याय संहिता कलम १२३ अंतर्गत करण्यात येणारी ही कारवाई सत्र न्यायालयात चालणार असून, यामध्ये दोषींना १० वर्षांपर्यंतच्या कारावासासह दंडाच्या शिक्षेची तरतूद आहे. कडक कायदेशीर तरतुदींमुळे या मोहिमेचे सकारात्मक परिणाम दिसून येत आहेत.
अवैध व्यवसायांविरुद्धची माहिती थेट पोलिसांपर्यंत पोहोचवण्यासाठी पोलीस उप महानिरीक्षक कार्यालयाने ‘खबर’ नावाची हेल्पलाइन सुरू केली आहे. नागरिकांनी ९१ ५० १०० १०० या क्रमांकावर फोन करून किंवा व्हॉट्सॲप मेसेजद्वारे आपल्या भागातील अवैध व्यवसायांची माहिती द्यावी, असे आवाहन पोलीस उप महानिरीक्षक शहाजी उमाप यांनी केले आहे.
