Ankush Sonsale
आयजी शहाजी उमाप यांच्या विशेष पथकाची अवैध व्यवसायांविरुद्ध धडक मोहीम
नांदेड : परिक्षेत्राचे पोलीस उप महानिरीक्षक शहाजी उमाप यांच्या विशेष पथकाने नांदेड आणि परभणी जिल्ह्यात अवैध व्यवसायांविरुद्ध धडक मोहीम राबवली आहे. या मोहिमेत लोहा शहरात चालणाऱ्या मटका बुकीवर आणि पालम परिसरातील अवैध रेती वाहतुकीवर धाडी टाकून एकूण ११ लाख १० हजार १०० रुपयांचा मुद्देमाल जप्त करण्यात आला आहे. या धडक कारवाईमुळे अवैध धंदेवाल्यांचे चांगलेच धाबे दणाणले आहेत.
दि. १८ मार्च रोजी लोहा शहरातील छत्रपती शिवाजी चौक परिसरातील एका शेडमध्ये ‘कल्याण मटका’ खेळणाऱ्या आणि खेळवून घेणाऱ्या बुकीवर पोलिसांनी छापा टाकला. या कारवाईत १७ आरोपींना ताब्यात घेण्यात आले असून, त्यांच्याकडून ६२ हजार ६०० रुपयांची रोकड आणि ३ मोबाईल असा एकूण ९६ हजार १०० रुपयांचा मुद्देमाल जप्त केला आहे. विशेष म्हणजे, या जुगार अड्ड्यात लोहा नगरपरिषदेच्या एका नगरसेवकाचाही समावेश असल्याचे निष्पन्न झाले आहे. याप्रकरणी लोहा पोलीस ठाण्यात महाराष्ट्र जुगार कायद्यान्वये गुन्हा दाखल करण्यात आला असून, पुढील तपास पोलीस उपनिरीक्षक सी. जी. पांचाळ करत आहेत.
दुसरीकडे पालम पोलीस ठाण्याच्या हद्दीत अवैध वाळू उपसा प्रकरणी १७ मार्च रोजी कारवाई करण्यात आली. पालम ते पेठपिंपळगांव रोडवर अवैधरित्या रेतीची वाहतूक करणारा हायवा पोलिसांनी पकडला. या कारवाईत १० लाख १४ हजार रुपये किमतीचा हायवा आणि चार ब्रास वाळू जप्त करण्यात आली आहे. याप्रकरणी एका आरोपीला ताब्यात घेऊन त्याच्याविरुद्ध भारतीय न्याय संहिता आणि महाराष्ट्र जमीन महसूल अधिनियमान्वये गुन्हा नोंदवण्यात आला असून, पोलीस अंमलदार शंकर कोलमवाड या प्रकरणाचा तपास करत आहेत.
पोलीस उप महानिरीक्षक शहाजी उमाप यांनी या यशस्वी कामगिरीबद्दल पथकातील अधिकारी आणि अंमलदारांचे अभिनंदन केले आहे. या पथकात पोलीस उपनिरीक्षक पंकज इंगळे यांच्यासह प्रदीप खानसोळे, संजीव जिंकलवाड, गणेश धुमाळ आणि कामाजी गवळी यांचा समावेश होता. तसेच, नागरिकांनी आपल्या भागातील अवैध व्यवसायांची माहिती देण्यासाठी ९१ ५० १०० १०० या ‘खबर’ हेल्पलाइन क्रमांकावर संपर्क साधावा किंवा व्हॉट्सअॅप मेसेज करावा, असे आवाहनही त्यांनी केले आहे. माहिती देणाऱ्याचे नाव पूर्णपणे गोपनीय ठेवण्यात येईल, अशी ग्वाही देखील पोलीस प्रशासनाकडून देण्यात आली आहे.
