Ankush Sonsale
नांदेडमध्ये पुन्हा गोळीबार; कुख्यात ‘अबू शूटर’कडून तरुणावर जीवघेणा हल्ला; टोळीयुद्धातून गोळीबार झाल्याचा संशय
नांदेड : शहरात मागील काही दिवसांपासून शांत असलेले गुन्हेगारी जग पुन्हा एकदा गोळीबाराच्या घटनेने हादरले आहे. आज, ११ फेब्रुवारी रोजी पहाटेच्या सुमारास झालेल्या या गोळीबाराच्या घटनेमुळे शहरात मोठी खळबळ उडाली असून नागरिकांमध्ये भीतीचे वातावरण पसरले आहे. वाजेगाव परिसरात ही घटना घडली असून यामुळे पोलीस प्रशासनासमोर मोठे आव्हान उभे ठाकले आहे.
मिळालेल्या माहितीनुसार, पहाटे ३ वाजेच्या सुमारास वाजेगाव परिसरातील छोट्या बंधाऱ्याजवळ ही घटना घडली. ‘अबू शूटर’ या टोपणनावाने ओळखल्या जाणाऱ्या एका कुख्यात गुन्हेगाराने अरबाज नावाच्या युवकावर गोळीबार केला. या हल्ल्यात अरबाजला गोळी लागल्याने तो गंभीर जखमी झाला असून, त्याला तातडीने उपचारासाठी शासकीय रुग्णालयात दाखल करण्यात आले आहे. सध्या त्याची प्रकृती चिंताजनक असल्याचे समजते.
गोळीबार करणारा मुख्य आरोपी ‘अबू शूटर’ हा पोलिसांच्या रेकॉर्डवरील पाहिजे असलेला आरोपी आहे. धक्कादायक बाब म्हणजे, ज्याच्यावर गोळीबार झाला तो जखमी अरबाज हा देखील गुन्हेगारी पार्श्वभूमीचा असून त्याच्यावरही विविध गुन्हे दाखल असल्याची माहिती समोर आली आहे. यावरून हा प्रकार जुन्या वादातून किंवा टोळीयुद्धातून झाला असावा, असा प्राथमिक अंदाज वर्तवला जात आहे.
घटनेची माहिती मिळताच वरिष्ठ पोलीस अधिकाऱ्यांसह पोलिसांचे पथक घटनास्थळी दाखल झाले. पोलिसांनी परिसराचा पंचनामा केला असून घटनास्थळावरून पुरावे गोळा करण्याचे काम सुरू आहे. फरार झालेला आरोपी अबू शूटर याच्या शोधासाठी पोलिसांनी विविध ठिकाणी आपले जाळे पसरवले असून त्याच्या अटकेसाठी विशेष पथके रवाना करण्यात आली आहेत.
या घटनेमुळे नांदेड शहरात पुन्हा एकदा कायदा व सुव्यवस्थेचा प्रश्न ऐरणीवर आला आहे. पोलिसांनी नागरिकांना आवाहन केले आहे की, कुणीही अफवांवर विश्वास ठेवू नये. या प्रकरणाचा सखोल तपास सुरू असून, लवकरच आरोपीला जेरबंद केले जाईल, असा विश्वास पोलीस प्रशासनाकडून व्यक्त करण्यात आला आहे.
