पर्यावरणपूरक राख्यांचा अनोखा उपक्रम: पेनुरच्या विद्यार्थिनींनी दिला टाकाऊतून टिकाऊचा संदेश

पर्यावरणपूरक राख्यांचा अनोखा उपक्रम: पेनुरच्या विद्यार्थिनींनी दिला टाकाऊतून टिकाऊचा संदेश

नांदेड – बहिण-भावाच्या नात्याचा पवित्र सण असलेल्या रक्षाबंधनानिमित्त नांदेड जिल्ह्यातील पेनुर येथील जिल्हा परिषद शाळेच्या विद्यार्थिनींनी एक अनोखा आणि स्तुत्य उपक्रम राबवला आहे. या विद्यार्थिनींनी टाकाऊ वस्तूंपासून पर्यावरणपूरक आणि टिकाऊ राख्या तयार करून समाजात जनजागृतीचा संदेश दिला आहे.
बाजारात मिळणाऱ्या प्लास्टिकच्या राख्या पर्यावरणासाठी हानिकारक असतात. या गोष्टीला छेद देण्यासाठी पेनुर येथील जिल्हा परिषद हायस्कूलच्या गाईडच्या विद्यार्थिनींनी शिक्षकांच्या मार्गदर्शनाखाली विविध टाकाऊ वस्तूंपासून सुंदर राख्या बनवल्या. यात घरातील जुने कागद, कापड, कापूस, विविध धान्य (तांदूळ, गहू, मका), आईस्क्रीमच्या काड्या, शर्टची बटणं, टेलरिंगचे उरलेले कापड अशा अनेक वस्तूंना कल्पकतेची जोड देऊन त्यांनी पर्यावरणपूरक राख्या तयार केल्या.
या राख्यांचे आणखी एक वैशिष्ट्य म्हणजे त्यांच्या धाग्यांवर विविध सामाजिक संदेश कोरण्यात आले आहेत. ‘झाडे लावा, झाडे जगवा’, ‘पाणी बचत’, ‘स्वच्छता’, ‘शिक्षण’, ‘लेक वाचवा, लेक शिकवा’, ‘व्यसनमुक्ती’, ‘अंधश्रद्धा निर्मूलन’, ‘प्लास्टिकमुक्ती’, ‘देशभक्ती’ यांसारख्या महत्त्वाच्या विषयांवर या राख्या संदेश देतात.
या उपक्रमाचे कौतुक करण्यासाठी जिल्हा परिषद येथे मुख्य कार्यकारी अधिकारी मेघना कावली यांच्यासह अनेक अधिकारी उपस्थित होते. यावेळी विद्यार्थिनींनी वडाच्या झाडाला राखी बांधून वृक्षसंवर्धनाची शपथ घेतली. मुख्य कार्यकारी अधिकारी मेघना कावली यांनी या विद्यार्थिनींच्या उपक्रमाचे विशेष कौतुक केले. या उपक्रमामुळे पर्यावरण संरक्षणाचा संदेश देत विद्यार्थिनींनी एक आदर्श समाजासमोर ठेवला आहे.