Ankush Sonsale
नांदेड : श्री राम जन्मोत्सव समिती, नांदेडच्या वतीने हिंदू एकता दिवस व श्री राम जन्मोत्सवाचे औचित्य साधून यंदाही शहरात भव्य शोभायात्रेचे आयोजन करण्यात आले आहे. मागील १७ वर्षांची परंपरा जपत, येत्या २६ तारखेला (गुरुवारी) हा सोहळा मोठ्या उत्साहात पार पडणार असल्याची माहिती आयोजित पत्रकार परिषदेत देण्यात आली. या महोत्सवामुळे संपूर्ण शहर राममय होणार असून, हजारो भाविकांच्या उपस्थितीची शक्यता वर्तवण्यात आली आहे.
कार्यक्रमाची सुरुवात गुरुवारी दुपारी १२ वाजता रामघाट येथील श्री राम मंदिरात महाआरतीने होईल. त्यानंतर दुपारी १:३० वाजता गाडीपुरा येथील श्री रेणुका माता मंदिरात देवीची आरती आणि संतांच्या हस्ते प्रभू श्री रामांच्या मूर्तीचे अनावरण करून शोभायात्रेला रीतसर प्रारंभ केला जाईल. यावेळी शहरातील विविध मार्गांवरून ही यात्रा मार्गस्थ होणार आहे.
यंदाच्या शोभायात्रेचे मुख्य आकर्षण म्हणजे त्यात सादर केले जाणारे जिवंत देखावे आणि झाक्या. यामध्ये प्रामुख्याने राम-रावण युद्ध, भगवान नृसिंह अवतार, देशभक्तीने प्रेरित “ऑपरेशन सिंदूर”, भोलेनाथ व साधू-महात्मे, अयोध्येतील रामलल्लाची प्रतिकृती आणि गौमाता प्रतिमा यांचा समावेश असणार आहे. हे विविध आकर्षक देखावे पाहण्यासाठी नांदेडकरांमध्ये मोठी उत्सुकता निर्माण झाली आहे.
या सोहळ्याचे आणखी एक वैशिष्ट्य म्हणजे शिस्तबद्ध स्वयंसेवकांचा सहभाग. ‘धर्मरक्षक’ या नावाने ओळखल्या जाणाऱ्या सुमारे ७ हजार स्वयंसेवकांचा ताफा या यात्रेत सहभागी होणार आहे. तसेच, महिलांच्या सुरक्षेसाठी आणि सहभागासाठी विशेष ‘शौर्य पथकाची’ स्थापना करण्यात आली आहे, जे या यात्रेचे वेगळेपण अधोरेखित करते.
शोभायात्रेचा मार्ग जुना मोंढा टॉवर, संत बाबा निधानसिंह गुरुद्वारा चौक, महावीर चौक, वजीराबाद, कलामंदिर, शिवाजीनगर, महात्मा फुले पुतळा (ITI), श्रीनगर आणि वर्कशॉप असा निश्चित करण्यात आला आहे. यात्रेची सांगता अशोकनगर येथील श्री राम मंदिरात होईल, जिथे प्रभू रामांची आरती आणि महाप्रसादाचे वाटप केले जाईल.
या नियोजनाची माहिती देण्यासाठी आयोजित परिषदेला गणेशसिंह ठाकूर, संतोष (कालू) ओझा, मोहन पाटील, डॉ. रमेश नारलावार यांच्यासह समितीचे अनेक पदाधिकारी आणि असंख्य रामभक्त मोठ्या संख्येने उपस्थित होते. सर्वांनी या मंगल सोहळ्यात सहभागी होण्याचे आवाहन समितीच्या वतीने करण्यात आले आहे.
