Ankush Sonsale
रेल्वेच्या फुकट्या प्रवाशांकडून 3 लाख 42 हजार रुपये वसूल; एकाच दिवसात 500 प्रकरणे आढळली : नांदेड विभागात व्यापक तिकीट तपासणी मोहीम
नांदेड – प्रवाशांनी वैध तिकीटासह प्रवास करावा तसेच अनियमित प्रवासावर नियंत्रण ठेवण्यासाठी दक्षिण मध्य रेल्वेच्या नांदेड विभागात दिनांक 26 मार्च रोजी सकाळी 6 ते सायंकाळी 8 वाजेपर्यंत व्यापक तिकीट तपासणी मोहीम राबविण्यात आली. या मोहिमेवर नांदेडचे सहाय्यक वाणिज्य व्यवस्थापक, शैलेश कुमार सिंह यांनी देखरेख ठेवली.
या विशेष मोहिमेत 28 तिकीट तपासणी कर्मचारी सहभागी झाले होते. यावेळी विविध मार्गांवरील 25 गाड्यांची तपासणी करण्यात आली. या सखोल तपासणीदरम्यान विनातिकीट प्रवास, अनियमित प्रवास तसेच अनारक्षित सामान यांची एकूण 500 प्रकरणे आढळून आली. त्यावर रेल्वे नियमांनुसार कारवाई करण्यात आली.
यामध्ये 449 विनातिकीट प्रवास (TWT) प्रकरणांमधून 2 लाख 14 हजार 410 भाडे व 1 लाख 15 हजार 190 दंड वसूल करण्यात आला. तसेच 15 अनियमित प्रवास (IRT) प्रकरणांमधून 3 हजार 730 भाडे व 3 हजार 750 दंड वसूल करण्यात आला. याशिवाय 36 अनारक्षित लगेज (UBL) प्रकरणांमधून 5 हजार 500 रक्कम वसूल करण्यात आली. अशा प्रकारे या एकदिवसीय विशेष मोहिमेत 500 प्रकरणांमधून एकूण 3 लाख 42 हजार 580 इतकी रक्कम वसूल करण्यात आली.
दरम्यान, प्रवाशांनी नेहमी वैध तिकीटासहच प्रवास करावा तसेच प्रवासादरम्यान सोबत असलेले सामान नियमानुसार बुक करावे. विनातिकीट किंवा अनियमित प्रवास करणे हे रेल्वे कायद्यांतर्गत दंडनीय अपराध आहे. सुरक्षित, सुलभ व आरामदायी प्रवासासाठी प्रवाशांनी रेल्वे प्रशासनास सहकार्य करावे, असे आवाहन रेल्वे प्रशासनाने केले आहे.
