Ankush Sonsale
विष्णुनगरमध्ये भीषण आग; अग्निशमन दलाच्या तत्परतेमुळे ३ गॅस सिलिंडरसह लाखोचा मुद्देमाल वाचवण्यात यश
नांदेड : विष्णुनगर भागात रविवारी पहाटे लागलेल्या आगीवर अग्निशमन दलाने वेळीच नियंत्रण मिळवल्याने मोठी जीवितहानी व वित्तहानी टळली आहे. या घटनेत घरातील साहित्याचे नुकसान झाले असले, तरी जवानांनी धाडसाने तीन गॅस सिलिंडर आगीतून बाहेर काढल्याने मोठा अनर्थ टळला.
नेमकी घटना काय?
दिनांक २ फेब्रुवारी रोजी सकाळी ६:३० वाजता विष्णुनगर येथील एका घरात आग लागल्याची माहिती अग्निशमन विभागाला मिळाली. घटनेचे गांभीर्य ओळखून अवघ्या एका मिनिटात, म्हणजेच ६:३१ वाजता ‘फर्स्ट टर्न आऊट’ पथक घटनास्थळी रवाना झाले. जवानांनी तातडीने घटनास्थळी पोहोचून होजरील होजच्या साहाय्याने पाण्याचा मारा सुरू केला.
आग घरामध्ये पसरल्याने घरातील एसी (AC), टीव्ही, कटलरीचे सामान, पलंग, टेबल, सोफा आणि इतर घरगुती साहित्याने पेट घेतला होता. मात्र, अग्निशमन दलाने जीवाची पर्वा न करता किचनमध्ये असलेले तीन गॅस सिलिंडर सुरक्षितरीत्या बाहेर काढले. जर या सिलिंडरचा स्फोट झाला असता, तर आगीने रौद्र रूप धारण केले असते.
अग्निशमन दलाच्या या कामगिरीमुळे केवळ आग विझली नाही, तर घरातील १० हजार रुपये रोख आणि एका खोलीतील सुमारे दीड ते दोन लाख रुपयांचे साहित्य सुरक्षित वाचवण्यात यश आले आहे.
ही मोहीम अग्निशमन अधिकारी के. एस. दासरे, उप अग्निशमन अधिकारी निलेश कांबळे, कर्मचारी साजिद, गीते, खंदारे आणि वाहन चालक नरवाडे यांच्या पथकाने यशस्वीरीत्या फत्ते केली.
