Ankush Sonsale
मुदखेडमध्ये अवैध वाळू उपशावर मोठी कारवाई; ७५ लाखांचे साहित्य जिलेटीनने उडवले
नांदेड : मुदखेड पोलीस आणि महसूल विभागाने वासरी शिवारातील गोदावरी नदी पात्रात सुरू असलेल्या अवैध वाळू उपशावर शनिवारी, ३१ जानेवारी २०२६ रोजी मोठी संयुक्त कारवाई केली. या कारवाईत वाळू उपसा करण्यासाठी वापरण्यात येणाऱ्या तीन बोटी, इंजिन आणि हॉपरसह एकूण ७५ लाख ३० हजार रुपयांचा मुद्देमाल जप्त करण्यात आला. विशेष म्हणजे, जप्त केलेले साहित्य अवजड असल्याने प्रशासनाने ते जागीच जिलेटीनच्या साहाय्याने ब्लास्ट करून नष्ट केले आहे.
नांदेडचे पोलीस अधीक्षक अबिनाश कुमार यांच्या आदेशानुसार अवैध वाळू उपसा रोखण्यासाठी विशेष पथके तैनात करण्यात आली होती. ३१ जानेवारी रोजी सकाळी साडे १० वाजेच्या सुमारास मुदखेड पोलीस व महसूल विभागाच्या पथकाला वासरी शिवारात अवैध उपसा सुरू असल्याची खात्रीशीर माहिती गुप्त बातमीदाराकडून मिळाली. पथक घटनास्थळी पोहोचले असता, वाळू उपसा करणारे तीन अज्ञात आरोपी पथकाला पाहून तेथून पळून जाण्यात यशस्वी झाले.
या कारवाईत पोलिसांनी १५ लाख रुपये किमतीच्या ३ छोट्या बोटी व लोखंडी इंजिन, ६० लाख रुपये किमतीचे ३ हॉपर आणि ३० हजार रुपयांचे दोन थर्माकॉल तराफे असा एकूण ७५ लाख ३० हजार रुपयांचा मुद्देमाल हस्तगत केला. पर्यावरणाची काळजी घेत, हे सर्व साहित्य हलवणे कठीण असल्याने अधिकाऱ्यांनी ते जागेवरच स्फोट घडवून नष्ट करण्याचा निर्णय घेतला. या प्रकरणी मुदखेड पोलीस ठाण्यात भारतीय न्याय संहितेच्या कलम ३०३(२), ६२, ३(५) आणि महाराष्ट्र महसूल अधिनियमानुसार गुन्हा दाखल करण्यात आला आहे.
ही धाडसी कारवाई पोलीस अधीक्षक अबिनाश कुमार, अपर पोलीस अधीक्षक अर्चना पाटील आणि सुरज गुरव यांच्या मार्गदर्शनाखाली मुदखेडचे पोलीस निरीक्षक धिरज चव्हाण, तहसीलदार आनंद देऊळगांवकर व त्यांच्या पथकाने यशस्वीरित्या पार पाडली. या कामगिरीबद्दल पोलीस अधीक्षकांनी सहभागी सर्व अधिकारी व अंमलदारांचे कौतुक केले असून, या गुन्ह्याचा पुढील तपास पोलीस उपनिरीक्षक बंडू गवई करत आहेत.
