Ankush Sonsale
नांदेड शहरात माजी पंतप्रधान अटल बिहारी वाजपेयी यांच्या पूर्णाकृती पुतळ्याचा प्रस्ताव; निधी व जागा संपादन करण्याबाबत सभेत घेतला जाणार निर्णय
नांदेड: स्थानिक स्वराज्य संस्था निवडणुकीनंतर महानगरपालिकेची पहिली सर्वसाधारण सभा सोमवार, दि. १६ मार्च रोजी सकाळी ११ वाजता आयोजित करण्यात आली आहे. महापौर कविता संतोष मुळे यांच्या अध्यक्षतेखाली ही सभा महापालिकेच्या मुख्य प्रशासकीय इमारतीतील चौथ्या मजल्यावरील कै. शंकरराव चव्हाण सभागृहात पार पडणार आहे. या सभेमध्ये स्थायी समिती आणि इतर विशेष समित्यांच्या निवडीचा मुख्य अजेंडा असणार आहे.
या सभेतील सर्वात महत्त्वाचा विषय म्हणजे महाराष्ट्र महानगरपालिका अधिनियमातील सुधारित कलम ३१-अ नुसार स्थायी समितीवर नामनिर्देशनाद्वारे १६ सदस्यांची निवड करणे हा आहे. महापालिकेतील विविध पक्ष आणि आघाड्यांच्या तौलनिक संख्याबळानुसार या जागांचे वाटप करण्यात आले आहे. यामध्ये भारतीय जनता पार्टी-शिवसेना महायुतीला सर्वाधिक १० जागा, तर काँग्रेस वंचित बहुजन आघाडी नांदेड लोकन्याय विकास आघाडी आणि एमआयएम (AIMIM) पक्षाला प्रत्येकी ३ जागा मिळण्याचे प्रलंबित आहे.
स्थायी समितीसोबतच शिक्षण महिला व बालकल्यण समितीवर ११ सदस्यांची नियुक्ती केली जाणार आहे. नियमानुसार, या समितीमध्ये किमान ७५ टक्के म्हणजेच एकूण ८ महिला सदस्यांची नियुक्ती करणे अनिवार्य आहे. या समितीवर देखील पक्षीय बलाबलानुसार महायुतीला ७, तर काँग्रेस वंचित बहुजन आघाडी लोकन्याय विकास आघाडी आणि एमआयएमला प्रत्येकी २ जागांचे वाटप निश्चित करण्यात आले आहे.
समित्यांवरील नियुक्तीसाठी सदस्यांची नावे पाठवताना ती बंद पाकिटात महापौरांकडे सभेच्या वेळी सादर करण्याच्या सूचना देण्यात आल्या आहेत. जर ही नावे सभेपूर्वी द्यायची असतील, तर त्याची एक प्रत आयुक्तांनाही बंद पाकिटात देणे आवश्यक आहे. या प्रक्रियेमुळे समित्यांच्या निवडीत कमालीची गुप्तता पाळली जाणार असून, राजकीय वर्तुळात कोणत्या सदस्यांना संधी मिळते, याची उत्सुकता वाढली आहे.
या सभेमध्ये केवळ समित्यांच्या निवडीच नव्हे, तर शहराच्या सौंदर्यीकरणाच्या दृष्टीने एक महत्त्वाचा प्रस्तावही चर्चेला येणार आहे. भारताचे माजी पंतप्रधान भारतरत्न अटलबिहारी वाजपेयी यांचा पूर्णाकृती पुतळा शहरातील योग्य ठिकाणी उभारण्याबाबतचा प्रस्ताव सादर करण्यात आला आहे. त्यांच्या कार्याची माहिती नवीन पिढीला व्हावी आणि त्यातून प्रेरणा मिळावी, या उद्देशाने हा पुतळा उभारणे, त्यासाठी निधी मंजूर करणे आणि जागा संपादनाची कार्यवाही करणे यावर सभा निर्णय घेणार आहे.
