Ankush Sonsale
ठेकेदाराच्या संथ आणि निकृष्ट कामाचा फटका; आठवडा उलटूनही परिस्थिती जैसे थे
नांदेड: विणकर कॉलनी ते लुंबिनीनगर या मुख्य रस्त्यावर सुरू असलेले ड्रेनेज लाईनचे काम प्रशासनाच्या आणि संबंधित ठेकेदाराच्या उदासीनतेमुळे वादाच्या भोवऱ्यात सापडले आहे. मागील आठ दिवसांपासून या रस्त्यावरील काम पूर्णपणे बंद असून, खोदलेल्या खड्ड्यांमुळे आणि पसरलेल्या मातीमुळे परिसरातील नागरिकांना, विशेषतः लहान मुलांना प्रचंड त्रासाला सामोरे जावे लागत आहे.
या परिसरातून दररोज शेकडो लहान मुले शाळा आणि ट्युशनसाठी ये-जा करतात. मात्र, रस्त्याच्या मधोमध असलेले खड्डे आणि अर्धवट सोडून दिलेले ड्रेनेजचे काम यामुळे रस्ता चालण्यायोग्य उरलेला नाही. चिखल आणि धुळीमुळे अपघात होण्याची भीती पालकांकडून व्यक्त केली जात आहे. “आठ दिवस झाले काम बंद आहे, मुलांना शाळेत ने-आण करताना जीव मुठीत धरून चालावे लागते,” अशी संतप्त प्रतिक्रिया एका पालकाने दिली आहे.
स्थानिक नागरिकांच्या म्हणण्यानुसार, यापूर्वीच्या गुत्तेदाराने (ठेकेदाराने) केलेले काम अत्यंत निकृष्ट दर्जाचे होते, ज्यामुळे ड्रेनेजची समस्या वारंवार उद्भवत आहे. आता सुरू असलेले कामही अतिशय संथ गतीने सुरू असून, आठवडाभरापासून तिथे एकही मजूर फिरकलेला नाही. यामुळे परिसरात दुर्गंधी पसरण्याची आणि आरोग्याचे प्रश्न निर्माण होण्याची शक्यता आहे.
रस्त्यावरील हे अडथळे तातडीने दूर करून ड्रेनेजचे काम पूर्ण करावे, अशी मागणी विणकर कॉलनी आणि लुंबिनीनगरमधील रहिवाशांनी केली आहे. जर येत्या दोन दिवसांत कामाला गती मिळाली नाही, तर महापालिकेवर मोर्चा काढण्याचा इशाराही स्थानिक नागरिकांनी दिला आहे.
