Ankush Sonsale
अतिवृष्‍टी, पुरामुळे बाधित शेतक-यांना मदतीचा हात; नांदेड जिल्ह्यासाठी शासनाकडून ८१२ कोटी रुपयांचा निधी मंजूर
नांदेड – जिल्ह्यातील माहे सप्‍टेबर, 2024 मधील अतिवृष्‍टी व पुरामुळे बाधित शेतक-यांना मदतीसाठी शासनाने ८१२ कोटी मंजुर केले आहेत.
नांदेड जिल्‍ह्यात सप्‍टेबर २०२४ या महिन्‍यात अतिवृष्‍टीमुळे पिक नुकसान झालेल्‍या ७ लाख ८३ हजार ९१५ शेतकर्‍यांना मदतीसाठी शासनाने ८१२ कोटी ३८ लक्ष इतकी रक्‍कम मंजूर केली आहे. ही रक्‍कम बाधित शेतकरी यांना ऑनलाईन प्रणालीद्वारे वाटप करण्‍यात येणार आहे. त्‍यासाठी आता पर्यंत जिल्‍हृयातील ३ लाख ८३ हजार २९७ इतक्‍या शेतकर्‍यांना ४१७ कोटी ५२ लक्ष इतक्‍या रकमेचे वाटप करण्‍यासाठीची माहिती ऑनलाईन प्रणालीवर तहसील कार्यालयातून भरण्‍यात आली आहे.
माहिती भरण्‍यात आलेल्‍या शेतकऱ्याचे संदर्भ क्रंमांक ( व्ही.के. नंबर ) त्या त्या गावाच्या तलाठयांना देण्‍यात आले आहेत. ( व्ही.के. नंबर ) या संदर्भ क्रमांकाद्वारे सेतू सुविधा/ आपले सरकार केंद्रावर जाऊन ई-केवायसी पूर्ण करणा-या शेतकर्‍यांच्या खात्‍यावर थेट मदतीची रक्‍कम जमा होणार आहे. उर्वरीत ४ लक्ष शेतकरी यांची माहिती पुढील २ दिवसात भरण्‍यात येणार आहे.
त्‍यामुळे सप्‍टेबर २०२४ या महिन्‍यात अतिवृष्‍टीमुळे पिक नुकसान झालेल्‍या शेतकऱ्यानी तलाठी कार्यालयात जाऊन आपला संदर्भ क्रमांक घ्‍यावा व ई-केवायसी पूर्ण करुन घ्‍यावी, जेणे करुन त्‍यांच्‍या खात्‍यावर मदतीची रक्‍कम जमा होईल, असे आवाहन जिल्‍हाधिकारी अभिजीत राऊत यांनी केले आहे.
