Ankush Sonsale
नांदेड जिल्ह्यात पोलीस निरीक्षकांच्या बदल्यांचा धडाका
नांदेड ग्रामीण, विमानतळ, अर्धापूर, मुदखेडसह ६ अधिकाऱ्यांची खांदेपालट
Nanded Vruttavedh
नांदेड – महाराष्ट्र शासनाच्या गृह विभागाच्या मार्गदर्शक सूचनांनुसार नांदेड जिल्ह्यात पोलीस प्रशासनात मोठे फेरबदल करण्यात आले आहेत. नांदेडचे पोलीस अधीक्षक कार्यालयाकडून ६ ऑक्टोबर रोजी यासंदर्भातील अधिकृत आदेश जारी करण्यात आले असून जिल्ह्यातील ६ पोलीस निरीक्षकांच्या बदल्या करण्यात आल्या आहेत. कायदा व सुव्यवस्था अधिक मजबूत करण्यासाठी आणि प्रशासकीय कामकाज गतिमान करण्यासाठी हे बदल करण्यात आल्याचे सांगण्यात येत आहे.
या प्रशासकीय फेरबदलांतर्गत पोलीस निरीक्षक सुभाष पांडुरंग उन्हाळे यांची विमानतळ सुरक्षा विभागातून नायगाव पोलीस ठाण्यात बदली करण्यात आली आहे. नायगाव पोलीस ठाण्याची धुरा सांभाळणारे पोलीस निरीक्षक अमोल हरिसास भगत यांची आता अर्धापूर पोलीस ठाण्याचे प्रमुख म्हणून नियुक्ती करण्यात आली आहे.
त्याचप्रमाणे अर्धापूर पोलीस ठाण्याचे पोलीस निरीक्षक महादेव हनमंतराव मांजरमकर यांची विमानतळ सुरक्षा विभागात रवानगी करण्यात आली आहे. तर नांदेड ग्रामीणचे पोलीस निरीक्षक ओमकांत आनंदराज चिंचोलकर यांची नियंत्रण कक्षात बदली करण्यात आली असून, नियंत्रण कक्षात कार्यरत असणारे पोलीस निरीक्षक अशोक तुकाराम जाधव यांच्याकडे नांदेड ग्रामीण पोलीस ठाण्याची जबाबदारी सोपवण्यात आली आहे.
या प्रमुख ५ बदल्यांव्यतिरिक्त जिल्ह्यात आणखी एक महत्त्वाचा बदल करण्यात आला आहे. मुदखेडचे पोलीस निरीक्षक यांची नियंत्रण कक्षात बदली करण्यात आली असून त्यांच्या जागी पोलीस निरीक्षक गणेश कराड यांची मुदखेड पोलीस ठाण्याचे नवीन प्रमुख म्हणून नियुक्ती करण्यात आली आहे.
पोलीस अधीक्षक कार्यालयाने काढलेल्या या आदेशानुसार बदली झालेल्या सर्व पोलीस निरीक्षकांनी विनाविलंब आपल्या नवीन पदस्थापनेचा कार्यभार स्वीकारावा, असे स्पष्ट निर्देश देण्यात आले आहेत. तसेच पदभार स्वीकारल्यानंतर तात्काळ त्याचा अनुपालन अहवाल वरिष्ठ कार्यालयाकडे सादर करण्याचे आदेशही देण्यात आले आहेत.
नायगाव, अर्धापूर, नांदेड ग्रामीण, मुदखेड, नियंत्रण कक्ष आणि विमानतळ सुरक्षा या अत्यंत महत्त्वाच्या ठिकाणच्या अधिकाऱ्यांमध्ये फेरबदल झाल्यामुळे संपूर्ण जिल्ह्यात पोलीस प्रशासनाचा नवा चेहरा पाहायला मिळणार आहे. आगामी काळात कायदा व सुव्यवस्था अबाधित ठेवणे आणि स्थानिक गुन्हेगारीवर वचक बसवणे या दृष्टीने हे सर्व नवन नियुक्त अधिकारी लवकरच आपल्या कामाची सूत्रे हाती घेतील.
