Ankush Sonsale
चळवळ जगणारा विचारवंत हरपला
Nanded Vruttavedh
नांदेड – सुप्रसिद्ध नाट्यलेखक, रंगकर्मी आणि आंबेडकरी चळवळीतील अभ्यासक-विचारवंत डॉ. विलासराज भद्रे यांचे आज (५ ऑक्टोबर) पहाटे ४.४५ वाजता अल्पशा आजाराने निधन झाले. वयाच्या ५६ व्या वर्षी त्यांनी अखेरचा श्वास घेतला. त्यांच्या निधनाने नाट्यसृष्टी, सांस्कृतिक आणि आंबेडकरी वैचारिक चळवळीवर शोककळा पसरली आहे.
डॉ. भद्रे यांनी वैद्यकीय क्षेत्रात सेवा बजावतानाच कला आणि साहित्याची आवड जोपासली. रंगभूमीवर अभिनय आणि दिग्दर्शनाच्या माध्यमातून त्यांनी आपले वेगळे स्थान निर्माण केले होते. नाटककार म्हणून त्यांनी लिहिलेल्या आणि दिग्दर्शित केलेल्या कलाकृतींना रसिकप्रेक्षकांचा मोठा प्रतिसाद मिळाला.
आंबेडकरी विचारसरणीचा गाढा अभ्यास असलेल्या डॉ. भद्रे यांनी आपल्या साहित्यातून सामाजिक, सांस्कृतिक आणि वैचारिक भान नेहमीच जपले. शोषित आणि वंचितांच्या वेदनांना वाचा फोडणारे लेखन हे त्यांच्या साहित्याचे प्रमुख वैशिष्ट्य राहिले. त्यांनी आपल्या कार्यातून सामाजिक बांधिलकीचे सातत्यपूर्ण दर्शन घडवले.
त्यांच्या पार्थिवावर आज, ५ ऑक्टोबर रोजी दुपारी ३ वाजता उमरी (रेल्वे स्टेशन) येथे अंत्यसंस्कार करण्यात येणार आहेत. उमरी व नांदेड परिसरातील अनेक मान्यवर, कलावंत आणि नागरिक अंत्यविधीसाठी उपस्थित राहणार आहेत.
त्यांच्या पश्चात आई, एक भाऊ (माजी नगरसेवक अरुण भद्रे), पत्नी डॉ. वंदना भद्रे, एक मुलगी आणि दोन बहिणी असा मोठा परिवार आहे. त्यांच्या निधनाने कला, साहित्य आणि सामाजिक क्षेत्रातील एका अभ्यासू व्यक्तिमत्त्वाला समाज अंतरला आहे.
