भाग्यनगर गुन्हे शोध पथकाची मोठी कारवाई; दरोड्यातील ६ आरोपींना अटक, ३ लाखांचा मुद्देमाल जप्त

भाग्यनगर गुन्हे शोध पथकाची मोठी कारवाई; दरोड्यातील ६ आरोपींना अटक, ३ लाखांचा मुद्देमाल जप्त

नांदेड – शहरात चोऱ्या आणि दरोड्याच्या घटनांना आळा घालण्यासाठी पोलीस अधीक्षक अबिनाश कुमार यांनी सर्व प्रभारी अधिकाऱ्यांना आदेश दिले होते. या मोहिमेअंतर्गत भाग्यनगर पोलीस ठाण्याचे गुन्हे शोध पथक गस्त घालत असताना, त्यांना एका गोपनीय बातमीदाराकडून महत्त्वाची माहिती मिळाली. तुळसी पार्क, पावडेवाडी येथे वॉचमन म्हणून काम करणाऱ्या एका तरुणाने आपल्या मित्रांच्या मदतीने दरोडा टाकला असल्याची खात्रीशीर माहिती मिळाल्यावर पोलिसांनी सापळा रचला. संशयावरून संतोष तुकाराम शेळके याला ताब्यात घेऊन विचारपूस केली असता, त्याने आपल्या पाच साथीदारांसह हा गुन्हा केल्याची कबुली दिली.
या प्रकरणात पोलिसांनी एकूण ६ आरोपींना अटक केली असून, त्यांचे वय १९ ते २२ वर्षांच्या दरम्यान आहे. अटक करण्यात आलेल्यांमध्ये सुनिल सुधाकर गच्चे, संतोष तुकाराम शेळके, प्रतिष प्रशांत गजभारे, उरुवेल राहुल सावंत, सोहम अशोक गायकवाड आणि हर्ष जगदीश कोकरे यांचा समावेश आहे. हे सर्व आरोपी नांदेडमधील आंबेडकरनगर, श्रावस्तीनगर आणि वसरणी भागातील रहिवासी आहेत. पोलिसांनी तांत्रिक तपासाच्या आधारे या सर्वांना वेगवेगळ्या ठिकाणांहून ताब्यात घेतले असून, त्यांच्यावर भारतीय न्याय संहितेच्या विविध कलमान्वये गुन्हा दाखल करण्यात आला आहे.
पोलिसांनी या कारवाईदरम्यान आरोपींकडून एकूण ३ लाख ७०० रुपयांचा मुद्देमाल जप्त केला आहे. यामध्ये गुन्ह्यात वापरलेली तलवार, लोखंडी रॉड, दोन मोटार सायकली, २० हजार रुपये रोख आणि १० हजार रुपये किमतीचा एक मोबाईल फोन यांचा समावेश आहे. हा सर्व मुद्देमाल जप्त करून पोलिसांनी दरोड्याचा हा मोठा गुन्हा उघडकीस आणला आहे. या कारवाईमुळे शहरातील गुन्हेगारांमध्ये दहशतीचे वातावरण निर्माण झाले असून, नागरिकांनी पोलिसांच्या या तत्परतेचे स्वागत केले आहे.
ही यशस्वी कामगिरी पोलीस अधीक्षक अबिनाश कुमार, अपर पोलीस अधीक्षक अर्चना पाटील, सुरज गुरव आणि उपविभागीय पोलीस अधिकारी रामेश्वर वेंजने यांच्या मार्गदर्शनाखाली पार पडली. भाग्यनगर पोलीस ठाण्याचे निरीक्षक संतोष तांबे, महेश माळी आणि गुन्हे शोध पथकाचे पोलीस उपनिरीक्षक विनोद देशमुख यांच्यासह विशाल माळवे, गजानन किडे, विष्णूकांत मुंडे व इतर अंमलदारांनी या कारवाईत मोलाची भूमिका बजावली. या उल्लेखनीय कामगिरीबद्दल पोलीस अधीक्षक कार्यालयाकडून संपूर्ण पथकाचे विशेष कौतुक करण्यात आले आहे.