Ankush Sonsale
सकल मराठा समाजाचा नांदेड येथील आक्रोश मोर्चा स्थगित – श्याम पाटील वडजे
नांदेड – उद्या १८ जानेवारी रोजी आयोजित करण्यात आलेला सकल मराठा समाजाचा नांदेड येथील आक्रोश मोर्चा स्थगित करण्यात आला असल्याची माहिती मराठा आंदोलक श्याम पाटील वडजे यांनी पत्रकार परिषदेत दिली.
सकल मराठा समाजातर्फे मस्साजोगचे सरपंच कै. संतोष देशमुख यांच्या हत्येसंदर्भात १८ जानेवारी रोजी भव्य आक्रोश मोर्चा काढला जाणार होता, असे सकल मराठा समाजाच्या ११ जानेवारीच्या बैठकीत ठरले होते. दरम्यान शासनाने आरोपी विरोधात मोक्का लावून आरोपींना पोलीस कोठडीत पाठविले. त्यामुळे उद्या नियोजित असलेला नांदेड येथील आक्रोश मोर्चा तुर्त स्थगित करण्यात आल्याची माहिती मराठा सेवक श्याम पाटील वडजे यांनी दिली.
जनमानसात दहशत निर्माण करणाऱ्या मस्साजोग घटनेने माणुसकीला काळीमा फासला आहे.नांदेडसाठी बीड जिल्ह्यातील मंत्री हे शासनाने पालकमंत्री म्हणून नेमू नयेत. २६ जानेवारी प्रजासत्ताक दिनानिमित्त बीडचे मंत्री नियुक्त करू नयेत, असेही श्याम पाटील वडजे यावेळी म्हणाले. या पत्रकार परिषदेला दशरथ कपाटे, गोविंद कदम शिर्शीकर, सुनील पाटील कदम, नाना पाटील बेटसांगवीकर, भास्करराव हंबर्डे, सुभाष कोल्हे, दत्ता खराटे , सुधीर देशमुख , नवनाथ जोगदंड , राज सरकार , दत्ता इंगळे, डॉ. बालाजी पेनूरकर व समस्त समाज बांधव उपस्थित होते.
